សណ្ឋាគារសុខា, ថ្ងៃទី៥ ខែកញ្ញា ឆ្នាំ២០២៥ — ក្នុងបរិយាកាសដ៏ល្អផូផង់និងសិរីសួស្ដី នៃសណ្ឋាគារសុខា អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានអញ្ជើញចុះហត្ថលេខាលើអនុស្សរណៈនៃការយោគយល់គ្នា (MOU) ជាមួយសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដើម្បីបង្កើតកិច្ចសហប្រតិបត្តិការរួមគ្នា ក្នុងការពង្រឹង និងលើកកម្ពស់ប្រសិទ្ធភាពការសម្រុះសម្រួលផ្សះផ្សាវិវាទក្នុងវិស័យធនាគារ និងហិរញ្ញវត្ថុ។
ពិធីចុះហត្ថលេខាបានប្រព្រឹត្តឡើងក្រោមអធិបតីភាពឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជាអនុប្រធានប្រចាំការនៃ អ.ដ.ក. ដែលបានតំណាងឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ។ កិច្ចពិធីនេះក៏មានការចូលរួមដោយលោក រ័ត្ន សោភ័ណ ប្រធានសមាគមធនាគារនៅកម្ពុជា និងលោកជំទាវ ឌិត នីតា ប្រធានសមាគមមីក្រូហិរញ្ញវត្ថុកម្ពុជា។
ក្រៅពីនេះ ក៏មានការចូលរួមសកម្មពីថ្នាក់ដឹកនាំដ៏ខ្ពង់ខ្ពស់ជាច្រើន ដូចជា លោក អែម កំណាន់ អគ្គនាយករង តំណាងឯកឧត្តមជំទាវបណ្ឌិត ជា សិរី អគ្គទេសាភិបាលធនាគារជាតិ, លោកជំទាវ ជាវាសនា រដ្ឋលេខាធិការក្រសួងយុត្តិធម៌ និងជាសមាជិក អ.ដ.ក., ឯកឧត្តម ឯម ច័ន្ទមករា រដ្ឋលេខាធិការក្រសួងយុត្តិធម៌ និងជាសមាជិក អ.ដ.ក., ព្រមទាំងឯកឧត្តម យ៉ម ផារ៉ូត ប្រតិភូរាជរដ្ឋាភិបាល និងជាអគ្គលេខាធិការនៃ អ.ដ.ក.។ ការចូលរួមយ៉ាងច្រើនកុះករទៀតរួមមានថ្នាក់ដឹកនាំអគ្គលេខាធិការដ្ឋាននៃ អ.ដ.ក., មន្ត្រីសម្រុះសម្រួលដោះស្រាយវិវាទ, និងតំណាងពីសមាគមធនាគារ និងសមាគមមីក្រូហិរញ្ញវត្ថុ ជាង ១០០ នាក់។
ក្នុងសុន្ទរកថាដ៏មានសារៈសំខាន់ ឯកឧត្តមបណ្ឌិត ជិន ម៉ាលីន បានបញ្ជាក់ថា អ.ដ.ក. បានឆ្លងកាត់វឌ្ឍនភាពសំខាន់ៗជាច្រើនក្នុងការដោះស្រាយវិវាទក្រៅប្រព័ន្ធតុលាការ ក្នុងរយៈពេលកន្លងមក។ ការចុះអនុស្សរណៈនៅពេលនេះ គឺជាជំហានថ្មីមួយ ដែលផ្គូផ្គងនឹងចក្ខុវិស័យ និងយុទ្ធសាស្រ្តរបស់អាជ្ញាធរ ដើម្បីលើកកម្ពស់ប្រសិទ្ធភាព និងសមត្ថភាពក្នុងការចូលរួមជាដៃគូសហការដ៏សំខាន់ ជាមួយវិស័យធនាគារ និងមីក្រូហិរញ្ញវត្ថុ។
ឯកឧត្តមបណ្ឌិត បានបន្ថែមថា ការចុះហត្ថលេខាលើអនុស្សរណៈនេះ គឺជាសញ្ញានៃការបង្កើតប្រព័ន្ធសហប្រតិបត្តិការដែលមានគោលដៅច្បាស់លាស់ ក្នុងការជួយបង្កើនប្រសិទ្ធភាពការសម្រុះសម្រួលវិវាទ ដែលជាជម្រើសថ្មីមានប្រសិទ្ធភាព សម្រាប់ពលរដ្ឋ និងអាជីវកម្មក្នុងការដោះស្រាយវិវាទ។ ពិសេសវិវាទពាក់ព័ន្ធនឹងបំណុល និងប្រតិបត្តិការហិរញ្ញវត្ថុ ដែលជាផ្នែកមួយដ៏សំខាន់នៃការរស់នៅប្រចាំថ្ងៃរបស់ប្រជាពលរដ្ឋ និងស្ថាប័នហិរញ្ញវត្ថុ។
បន្ទាប់ពីពិធីចុះហត្ថលេខា កម្មវិធីបានបន្តជាមួយសិក្ខាសាលាបណ្តុះបណ្តាលមន្ត្រីសម្រុះសម្រួលនៃ អ.ដ.ក. ដោយផ្តោតលើប្រធានបទ “ការពង្រឹងប្រសិទ្ធភាពនៃការដោះស្រាយវិវាទក្នុងវិស័យធនាគារ និងហិរញ្ញវត្ថុនៅកម្ពុជា”។ សិក្ខាសាលានេះមានគោលបំណងបង្កើនចំណេះដឹង និងជំនាញបន្ថែមអំពីវិធីសាស្រ្តសម្រុះសម្រួលស្របតាមស្តង់ដារអន្តរជាតិ ដើម្បីឆ្លើយតបទៅនឹងតម្រូវការបច្ចុប្បន្ននៃសង្គម និងដោះស្រាយវិវាទឲ្យមានលទ្ធភាពច្រើនជាងមុន។
អ្នកចូលរួមបានបញ្ជាក់ថា ការចុះអនុស្សរណៈ និងសិក្ខាសាលាបណ្តុះបណ្តាលនេះ មិនត្រឹមតែបង្កើតទំនុកចិត្តសាធារណៈនោះទេ ប៉ុន្តែថែមទាំងជួយស្ថាប័នហិរញ្ញវត្ថុ និងសមាគមពាក់ព័ន្ធទទួលបានប្រយោជន៍ក្នុងការបង្កើតបរិយាកាសប្រកួតប្រជែងដ៏មានតម្លាភាព និងទំនួលខុសត្រូវ។
គេរំពឹងថា អនុស្សរណៈនេះ នឹងក្លាយជាមូលដ្ឋានដ៏រឹងមាំសម្រាប់ការកសាងប្រព័ន្ធដោះស្រាយវិវាទក្រៅប្រព័ន្ធតុលាការ ដែលមានស្ថិរភាព សុវត្ថិភាព និងមានប្រសិទ្ធភាព កាន់តែច្រើនឡើង។ នេះគឺជាជំហានសំខាន់មួយក្នុងការគាំទ្រទៅដល់យុទ្ធសាស្រ្តរបស់រាជរដ្ឋាភិបាលកម្ពុជា ក្នុងការលើកកម្ពស់សិទ្ធិ និងផលប្រយោជន៍ប្រជាពលរដ្ឋ ក៏ដូចជាការលើកស្ទួយទំនុកចិត្តក្នុងវិស័យធនាគារ និងហិរញ្ញវត្ថុ។
