(ខេត្តព្រះសីហនុ)៖ ក្នុងខណៈដែលរាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត កំពុងខិតខំដោះស្រាយបញ្ហាដីធ្លីជូនប្រជាពលរដ្ឋឱ្យបានដាច់ស្រឡះ ស្រាប់តែលេចចេញនូវ «ដំបៅមហារីក» នៃជម្លោះដីធ្លីថ្មីមួយទៀតនៅភូមិបឹងតាស្រី ឃុំបឹងតាព្រហ្ម ស្រុកព្រៃនប់។ នេះមិនមែនជាជម្លោះធម្មតាទេ ប៉ុន្តែវាគឺជាការ «ប្លន់សិទ្ធិសេរីភាព» របស់ពលរដ្ឋ ១៨ គ្រួសារ ដែលកាន់កាប់ដីដោយស្របច្បាប់ជាង ៣០ ឆ្នាំ ពីសំណាក់បុគ្គលពីររូបគឺ ភិន ផល្លា និង ង៉ាន់ ភិរុណ ដែលកំពុងរងការចោទប្រកាន់ថាប្រើល្បិចកលប្តឹងជំទាស់រារាំងការចេញប័ណ្ណកម្មសិទ្ធិទាំងបំពាន។
ពីអ្នកការពារព្រំដែន មកជាជនរងគ្រោះនៃល្បិចកលជនខិលខូច!
តំណាងប្រជាពលរដ្ឋ ដែលជា អតីតនគរបាលការពារព្រំដែន A3 ធ្លាប់បានលះបង់កម្លាំងកាយចិត្តការពារទឹកដីនៅសមរភូមិកំពង់សោម បានលើកម្រាមដៃដប់ទាំងញ័រជើង ទទូចសុំយុត្តិធម៌ពី ឯកឧត្តម សាយ សំអាល។ លោកបានបញ្ជាក់ថា ដីទំហំ ២៣ ក្បាលដីនេះ គឺជាញើសឈាមដែលពួកគាត់បានកាប់ឆ្ការ និងអាស្រ័យផលតាំងពីឆ្នាំ ១៩៩៤ មកម៉្លេះ។ ប៉ុន្តែនៅពេលដែលមន្ទីរសុរិយោដីខេត្តព្រះសីហនុ រៀបចំចែកប័ណ្ណកម្មសិទ្ធិ (LMAP) ជាផ្លូវការនៅថ្ងៃទី ២៦ ខែកុម្ភៈ ឆ្នាំ ២០២៥ ស្រាប់តែឈ្មោះ ភិន ផល្លា និង ង៉ាន់ ភិរុណ បង្ហាញមុខមកប្តឹងជំទាស់ រារាំងមិនឱ្យពលរដ្ឋទទួលបានប័ណ្ណកម្មសិទ្ធិទៅវិញ។
សំណួរដាក់ជូនសាធារណជន៖ តើពួកគេយកឯកសារអ្វីមកប្តឹង?
ពលរដ្ឋកំពុងដាក់សំណួរយ៉ាងធ្ងន់ៗថា ៖
* តើបុគ្គល ភិន ផល្លា និង ង៉ាន់ ភិរុណ មានបង្កាន់ដៃចុះបញ្ជីដីធ្លីលេខប៉ុន្មាន? បើប្រជាពលរដ្ឋមានបង្កាន់ដៃរហូតដល់ ២៣ សន្លឹក (លេខ 851, 938, 939... រហូតដល់ 395) ដែលចេញដោយអាជ្ញាធរជំនាញតាំងពីឆ្នាំ ២០២៣?
* តើការប្តឹងជំទាស់ដោយគ្មានមូលដ្ឋានច្បាស់លាស់ គឺជាចេតនាទុច្ចរិតដើម្បី «គំរាមកំហែង» ឬ «ជំរិតទារប្រាក់» ពីពលរដ្ឋស្លូតត្រង់មែនទេ?
* តើមាន «បង្អែក» ឬមន្ត្រីខិលខូចណានៅពីក្រោយខ្នងបុគ្គលទាំងពីរនេះ ដែលហ៊ានធ្វើសកម្មភាពផ្គើននឹងគោលនយោបាយបញ្ចុះកម្តៅដីធ្លីរបស់រដ្ឋាភិបាល?
សំឡេងយំស្រែករកយុត្តិធម៌ "យើងខ្ញុំគ្មានអ្វីទីពឹងក្រៅពីយុត្តិធម៌របស់រដ្ឋមន្ត្រី"
តំណាងទាំង ១៨ គ្រួសារ រួមមាន លោក ខៀវ សាវឿន, លោក ទីវ លីណា និងលោក ឃួន ប៉ក់ បានថ្លែងទាំងក្តុកក្តួលថា ពួកគាត់មិនអាចដេកលក់បក់មិនលើយឡើយ។ ក្នុងនាមជាអតីតមន្ត្រីរាជការចូលនិវត្តន៍ និងជាអតីតនគរបាលការពារព្រំដែន A3 ពួកគាត់បានលះបង់ដើម្បីជាតិ ប៉ុន្តែចុងក្រោយបែរជាត្រូវជនអនាធិបតេយ្យមកដណ្តើមដីស្រែចម្ការដែលជាទ្រព្យចុងក្រោយទាំងបំពាន។
ពលរដ្ឋសូមលើកម្រាមដៃដប់ ស្នើសុំអន្តរាគមន៍ជាបន្ទាន់ពី៖
* ក្រសួងរៀបចំដែនដី នគរូបនីយកម្ម និងសំណង់៖ សូមឯកឧត្តមឧបនាយករដ្ឋមន្ត្រី សាយ សំអាល មេត្តាបញ្ជូនក្រុមការងារអធិការកិច្ចចុះពិនិត្យករណីនេះភ្លាមៗ កុំឱ្យបុគ្គលទុច្ចរិតយកការប្តឹងជំទាស់ធ្វើជាអាវុធធ្វើបាបរាស្ត្រ។
* រដ្ឋបាលខេត្តព្រះសីហនុ៖ សូមលោកអភិបាលខេត្ត មេត្តាជួយការពារពលរដ្ឋម្ចាស់ដីពិតប្រាកដ និងចាត់វិធានការតាមផ្លូវច្បាប់ចំពោះអ្នកដែលប្តឹងជំទាស់ដោយគ្មានភស្តុតាង។
* អង្គភាពប្រឆាំងអំពើពុករលួយ (ACU)៖ សូមមេត្តាពិនិត្យមើលសកម្មភាពរបស់បុគ្គលទាំងពីរ ថាតើមានការឃុបឃិតជាប្រព័ន្ធដើម្បីរំលោភយកដីធ្លីដែរឬទេ?
«យុត្តិធម៌សម្រាប់ពលរដ្ឋ ១៨ គ្រួសារ គឺជាកិត្យានុភាពនៃច្បាប់! កុំយកការប្តឹងជំទាស់ មកធ្វើជាល្បិចកលបិទបាំងអំពើអយុត្តិធម៌!»
ឯកឧត្ដម សាយ សំអាល់ ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់
ឯកឧត្តម ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ
