ខេត្តស្វាយរៀង៖ នាថ្ងៃទី១៤ ខែសីហា ឆ្នាំ២០២៦ នេះ សិក្ខាសាលាស្តីពី «ការពង្រឹងគុណភាព និងសង្គតិភាពទិន្នន័យទេសចរណ៍» ត្រូវបានរៀបចំឡើងយ៉ាងអធិកអធម ក្រោមអធិបតីភាពដ៏ខ្ពង់ខ្ពស់របស់ ឯកឧត្ដម នាង ម៉ៅ រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ ឯកឧត្ដម ហួត ហាក់ រដ្ឋមន្ត្រីក្រសួងទេសចរណ៍។
កម្មវិធីនេះក៏មានការអញ្ជើញចូលរួមពី លោក សេង សិលា អភិបាលរងនៃគណៈអភិបាលខេត្តស្វាយរៀង តំណាង ឯកឧត្ដម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង ព្រមទាំងលោក-លោកស្រី ជាអភិបាលរងរាជធានី-ខេត្តចំនួន ៥ រួមមាន រាជធានីភ្នំពេញ ខេត្តព្រៃវែង កំពង់ស្ពឺ ព្រះសីហនុ និងខេត្តស្វាយរៀង។
សិក្ខាសាលានេះដែរ មានការចូលរួមយ៉ាងកុះករពីឯកឧត្ដម លោកជំទាវ លោក លោកស្រី ប្រតិភូក្រសួងទេសចរណ៍ លោក វ៉ាន់ សារ៉ាត ប្រធានមន្ទីរទេសចរណ៍ខេត្តស្វាយរៀង លោក លោកស្រី ជាមន្ត្រីរាជការ និងមន្ត្រីកិច្ចសន្យាមន្ទីរទេសចរណ៍ខេត្តស្វាយរៀង លោក លោកស្រី ជាមន្ត្រីរាជការនៃមន្ទីរទេសចរណ៍រាជធានី-ខេត្តទាំង ៥ លោក លោកស្រី ជាប្រតិបត្តិករ/សេវាករទេសចរណ៍ក្នុងខេត្តស្វាយរៀង ព្រមទាំងសិស្ស-និស្សិតយ៉ាងច្រើនកុះករផងដែរ។
ឯកឧត្ដម នាង ម៉ៅ រដ្ឋលេខាធិការក្រសួងទេសចរណ៍ តំណាងដ៏ខ្ពង់ខ្ពស់ ឯកឧត្ដម ហួត ហាក់ រដ្ឋមន្ត្រីក្រសួងទេសចរណ៍បានមានប្រសាសន៍ថា អង្គសិក្ខា សាលានេះ គឺផ្តោតសំខាន់លើការស្វែងយល់ ផ្លាស់ប្តូរបទពិសោធន៍ និងទស្សនទានកែលម្អលើការប្រមូល ការគ្រប់គ្រង និងការវិភាគទិន្នន័យទេសចរណ៍ ឱ្យមានគុណភាព ប្រសិទ្ធភាព និងសង្គតិភាពខ្ពស់។ ទិន្នន័យត្រឹមត្រូវ និងច្បាស់លាស់ គឺជាគ្រឹះយ៉ាងសំខាន់មិនអាចខ្វះបាន ក្នុងការរៀបចំគោលនយោបាយ ផែនការយុទ្ធសាស្ត្រ និងការទាក់ទាញវិនិយោគិន ក៏ដូចជាភ្ញៀវទេសចរជាតិ និងអន្តរជាតិឱ្យមកកម្សាន្តកាន់តែច្រើនឡើងនៅក្នុងប្រទេសកម្ពុជា។
អង្គសិក្ខាសាលាបានបញ្ចប់ទៅដោយបរិយាកាសរីករាយ សស្និទ្ធស្នាល និងទទួលបានលទ្ធផលជាផ្លែផ្កាគួរជាទីមោទនៈ៕
