កំពង់ស្ពឺ៖ក្រោមការយកចិត្តទុកដាក់និងចង្អុលបង្ហាញពីសំណាក់លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ នៅវេលាម៉ោង៨:០០នាទីយប់ នាថ្ងៃទី១៤ ខែតុលា ឆ្នាំ២០២៦នេះ កម្លាំងមូលដ្ឋានកងរាជអាវុធហត្ថក្រុងឧដុង្គម៉ែជ័យ បានចូលរួមសហការអន្តរាគមន៍យ៉ាងសកម្មជាមួយគណះបញ្ជាការឯកភាពរដ្ឋបាលក្រុងឧដុង្គម៉ែជ័យ ក្នុងការជម្លៀសប្រជាពលរដ្ឋដែលរងគ្រោះដោយសារទឹកជំនន់ ដែលដឹកនាំដោយលោកស្រី យឹម សុខលាង អភិបាលរងក្រុងឧដុង្គម៉ែជ័យ។ជាក់ស្តែងស្ថិតនៅចំណុចភូមិក្រាំងពន្លៃ សង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ មានចំនួន១៤គ្រួសារដែលមានប្រជាពលរដ្ឋចំនួន៥៦នាក់ ក្នុងនោះមានចំនួន៧គ្រួសារ បានចេញមកទីទួលសុវត្តិភាព ចំណែក៧គ្រួសារទៀត បន្តរស់នៅទីតាំងផ្ទះដែរលិចទឹកដដែល(មិនព្រមចេញ)មកទីទួលសុវត្តិភាព ហើយជម្លៀស៧គ្រួសារ មកទីតាំងនៅក្នុងវត្តពោធ៍ ភូមិវត្តពោធ៍ សង្កាត់វាំងចាស់ ក្រុងឧដុង្គម៉ែជ័យ ខេត្តកំពង់ស្ពឺ។
លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ ក៏សូមអំពាវនាវនិងជម្រាបដល់ប្រប្អូនប្រជាពលរដ្ឋ ដែលរស់នៅក្នុងតំបន់ដែលមានទឹកជន់លិចសូមបង្កើនការប្រុងប្រយ័ត្នឲ្យបានខ្ពស់បំផុតនិងរៀបចំទុកដាក់ឥវ៉ាន់ និងឯកសារសំខាន់ៗទៅទីទួលសុវត្ថិភាពជាបន្ទាន់ជាពិសេសកុំធ្វើដំណើរឆ្លងកាត់ផ្លូវដែលមានទឹកហូរខ្លាំង កុំលេងទឹក និងត្រូវប្រុងប្រយ័ត្នចំពោះកុមារតូចៗ។ប្រសិនបើជាបងប្អូនប្រជាពលរដ្ឋនៅក្នុងភូមិសាស្ត្រខេត្តកំពង់ស្ពឺ បានជួបហេតុការណ៍ឫឧបទ្ទវហេតុផ្សេងៗហើយត្រូវការជំនួយអន្តរាគមន៍សង្គ្រោះពីកម្លាំងកងរាជអាវុធហត្ថខេត្តកំពង់ស្ពឺ សូមបងប្អូនទំនាក់ទំនងមកលេខទូរស័ព្ទអន្តរាគមន៏សង្គ្រោះបន្ទាន់ HotLine 1292 ដោយមិនចំណាយលុយនៅក្នុងការខលឡើយ24/24ម៉ោងឬអាចទំនាក់ទំនងតាមបណ្តាញ Telegram, WhatsApp, CoolApp និងតាមរយៈលេខទូរស័ព្ទ 010 61 68 68៕










