ខេត្តស្វាយរៀង៖ នាព្រឹកថ្ងៃទី ១៩ ខែតុលា ឆ្នាំ ២០២៦ នេះ លោក ចាន់ ឈន់ ប្រធានមន្ទីរបរិស្ថានខេត្តស្វាយរៀង បានអញ្ជើញចូលរួមក្នុង «សិក្ខាសាលាសមហរណកម្មកម្មវិធីវិនិយោគបីឆ្នាំរំកិល (២០២៧-២០២៩)» របស់រដ្ឋបាលក្រុង និងសង្កាត់ ក្នុងក្រុងស្វាយរៀង ខេត្តស្វាយរៀង។
សិក្ខាសាលានេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ប៉េង ពោធិ៍សា អភិបាល នៃគណៈអភិបាលខេត្តស្វាយរៀង ដោយមានការអញ្ជើញចូលរួមពីសំណាក់ថ្នាក់ដឹកនាំមន្ទីរ-អង្គភាពជុំវិញខេត្ត អាជ្ញាធរក្រុង-សង្កាត់ តំណាងអង្គការសង្គមស៊ីវិល និងភាគីពាក់ព័ន្ធជាច្រើនរូប នៅសាលប្រជុំសាលាក្រុងស្វាយរៀង។
សិក្ខាសាលាសមហរណកម្មកម្មវិធីវិនិយោគបីឆ្នាំរំកិលនេះ រៀបចំឡើងក្នុងគោលបំណង៖
សម្របសម្រួល និងបូកសរុបគម្រោងវិនិយោគ៖ គៀរគរ និងបញ្រ្ជៀបគម្រោងអាទិភាពរបស់សង្កាត់ និងក្រុង ទៅក្នុងផែនការអភិវឌ្ឍន៍ខេត្ត។
បត់បែន និងឆ្លើយតបតម្រូវការមូលដ្ឋាន៖ ស្វែងរកការគាំទ្រពីមន្ទីរជំនាញ ដៃគូអភិវឌ្ឍន៍ និងសប្បុរសជន លើគម្រោងអភិវឌ្ឍន៍ហេដ្ឋារចនាសម្ព័ន្ធ សេវាសង្គម និងការគ្រប់គ្រងបរិស្ថាន។
ពង្រឹងកិច្ចសហការ៖ បង្កើនភាពជាដៃគូរវាងរដ្ឋបាលថ្នាក់ក្រោមជាតិ និងមន្ទីរជំនាញជុំវិញខេត្ត ដើម្បីធានាថាការអភិវឌ្ឍឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋប្រកបដោយចីរភាព។
ការចូលរួមរបស់មន្ទីរបរិស្ថានខេត្ត ក្នុងសិក្ខាសាលានេះ គឺជាការបង្ហាញពីការយកចិត្តទុកដាក់ខ្ពស់ក្នុងការបញ្ចូលការងារការពារបរិស្ថាន ការគ្រប់គ្រងធនធានធម្មជាតិ និងការរៀបចំទីក្រុងបៃតង ទៅក្នុងផែនការវិនិយោគសាធារណៈរបស់មូលដ្ឋាន ដើម្បីលើកកម្ពស់សុខុមាលភាព និងជីវភាពរស់នៅរបស់ប្រជាពលរដ្ឋក្នុងក្រុងស្វាយរៀងឲ្យកាន់តែប្រសើរឡើង៕
លោកចាន់ ឈន់









