វិជ្ជាជីវៈសារព័ត៌មាន គឺជាកញ្ចក់ឆ្លុះបញ្ចាំងសង្គមដ៏មានតម្លៃ ជាសំឡេងពិតរបស់ប្រជាពលរដ្ឋ និងជាស្ពាននាំយកយុត្តិធម៌ជូនសហគមន៍។ ប៉ុន្តែគួរឱ្យសោកស្តាយ ដែលជនឱកាសនិយមមួយក្តាប់តូច បែរជាឆ្លៀតយកស្លាកដ៏ឧត្តុង្គឧត្តមនេះ ដើរបង្ខូចកេរ្តិ៍ឈ្មោះ និងជាន់ឈ្លីក្រមសីលធម៌សារព័ត៌មានទាំងមូល។
ជាក់ស្តែង ក្រោមបទបញ្ជាផ្ទាល់ពី ឯកឧត្តម សេង ធារិន មេបញ្ជាការរង និងជានាយសេនាធិការយុទ្ធភូមិភាគទី ៥ និងជាប្រធានក្រុមការងារបង្ក្រាបបទល្មើសនេសាទបឹងទន្លេសាប នៅព្រឹកថ្ងៃទី១៧ ខែតុលា ឆ្នាំ២០២៦ ក្រុមការងារដឹកនាំដោយ លោកវរសេនីយ៍ឯក ប៊ី រស្មីចន្នី បានចុះបង្ក្រាប និងឃាត់ខ្លួនជនសង្ស័យ ៣ នាក់ (អ្នកសារព័ត៌មានគេហទំព័រ RSM ២ នាក់ ឈ្មោះ អុំ ថា និង ស៊ឹម សុខា ព្រមទាំងអ្នកបើកទូកម្នាក់ឈ្មោះ ឃុត ផល្លី) នៅចំណុចកំពង់ហាវ ស្រុកកំពង់លែង ពីបទជំរិតទារប្រាក់ ១,៦លានរៀល ពីពលរដ្ឋដាក់ដាយនេសាទស្របច្បាប់នៅស្រុកជលគិរី ខេត្តកំពង់ឆ្នាំង។
អាងត្រឹមប័ណ្ណព្យួរក កាន់ប៊ិច និងកាមេរ៉ា បែរជាដើរគាបសង្កត់ជម្រិតទារប្រាក់ពីកសិករស្លូតត្រង់ដែលខិតខំហាលក្តៅហាលភ្លៀងចិញ្ចឹមក្រពះ។ ទង្វើដ៏ថោកទាបនេះ មិនមែនតំណាងឱ្យអ្នកសារព័ត៌មានអាជីពភាគច្រើនដែលកំពុងបំពេញការងារដោយស្មោះត្រង់នោះឡើយ ប៉ុន្តែវាជាសកម្មភាពរបស់ជនអគតិមួយក្តាប់តូចដែលយកអាជីពជាខែលដើម្បីបំពេញលោភលន់ផ្ទាល់ខ្លួន។
បុរាណាចារ្យលោកតែងពោលដាស់តឿនថា៖ «ចង្កៀងបំភ្លឺផ្លូវ មិនមែនយកទៅដុតផ្ទះ» «ក្រដាសខ្ចប់ភ្លើងមិនជិតឡើយ» និង «ចោរស្បថកុំជឿ ជនអគតិកុំទុកចិត្ត»។
សូមផ្ញើសារដាស់តឿនយ៉ាងម៉ឺងម៉ាត់ដល់អ្នកសារព័ត៌មានមួយចំនួនតូច សូមភ្ញាក់រលឹក និងកុំយកគំរូអាក្រក់បែបនេះមកអនុវត្តឱ្យសោះ ព្រោះ «អំពើទុច្ចរិតមិនដែលរស់ផុតពីសំណាញ់ច្បាប់នោះទេ»។ ចូលរួមទាំងអស់គ្នាគោរពក្រមសីលធម៌វិជ្ជាជីវៈឱ្យបានខ្ជាប់ខ្ជួន ការពារតម្លៃ និងកិត្តិយសស្ថាប័នព័ត៌មាន កុំឱ្យដង្កូវពីរបីក្បាលនេះធ្វើឱ្យស្អុយត្រីមួយកន្ត្រក និងបំផ្លាញជំនឿទុកចិត្តរបស់មហាជនបានឡើយ!







